जळगाव:  जिल्ह्यातील चाळीसगाव तालुक्यात एक अनोखा आणि आलिशान लग्नसोहळा पार पडला आहे. प्रगतशील शेतकरी भिकन रामचंद्र परदेशी यांची नात प्रिया हिचा विवाह सोमवारी चाळीसगावच्या कोदगाव चौफुली येथे मोठ्या थाटामाटात झाला. या लग्नाची चर्चा सध्या चाळीसगावसह पंचक्रोशीत रंगली आहे.

नवरदेव चेतन ठाकूर, संभाजीनगर येथील प्रतिष्ठित व्यावसायिक, यांनी आपल्या पत्नीला घरी नेण्यासाठी सरप्राईज दिले. त्यांनी चक्क हेलिकॉप्टरची व्यवस्था केली होती. हेलिकॉप्टरद्वारे नववधू प्रियाचा निरोप घेण्याची ही घटना गावकऱ्यांसाठी ऐतिहासिक ठरली. रांजणगाव येथील समस्त ग्रामस्थ प्रियाला निरोप देण्यासाठी हॅलिपॅडवर मोठ्या उत्साहात जमले होते.

प्रियाला निरोप देताना रांजणगावमधील ग्रामस्थ आणि तिच्या कुटुंबीयांचे डोळे पाणावले. हेलिकॉप्टर उडताना ग्रामस्थांनी नवदाम्पत्याला शुभेच्छा दिल्या आणि त्यांचे भावी वैवाहिक जीवन आनंदाने आणि सुखाने भरले जावे, अशी प्रार्थना केली.

या लग्नासाठी दोन्ही कुटुंबीयांनी मोठ्या तयारीने आणि आनंदात सहभाग घेतला. विवाह सोहळ्याला परिसरातील मान्यवर मंडळी, नातेवाईक, आणि मित्रमंडळी मोठ्या संख्येने उपस्थित होती.हा अनोखा लग्नसोहळा चाळीसगाव तालुक्यातील नागरिकांना चांगलाच संस्मरणीय ठरला आहे. नववधूला हेलिकॉप्टरने घेऊन जाण्याचा हटके उपक्रम सध्या सोशल मीडियावरही चर्चेत आहे.