बीड जिल्ह्यातील मस्साजोग येथील सरपंच संतोष देशमुख यांचे अपहरण आणि नंतर खून करण्यात आला. यासह खंडणीप्रकरणात वाल्मिक कराड सीआयडीसमोर शरण आला होता. त्याला केज न्यायालयात हजर केल्यानंतर पोलीस कोठडी सुनावण्यात आली होती. आता कोठडीत असताना वाल्मिक कराड याने मोठी मागणी केली आहे. त्याने न्यायालयाकडे या आजारात 24 तास मदतनीस मिळावा यासाठी दाद मागितली आहे. 

वाल्मिक कराड याने न्यायालयात धाव घेतली. स्लीप ॲप्निया या नावाचा आजार असल्याचा दावा कराड याने केला आहे. ऑक्सिजन मशीन त्यासाठी दररोज लावण्याची गरज आहे. या आजारात ऑटो सीपॅप ही मशीन झोपताना लावण्यात येते. ते चालवण्यासाठी एक मदतनीस 24 तास आवश्यक असल्याने, हा असिस्टंट आपल्याला देण्यात यावा अशी विनंती त्याने केली आहे. त्याने केज न्यायालयाकडे ही विनंती केली होती. सुनावणीशेवटी न्यायालयाने शासकीय वैद्यकीय सुविधा पुरवण्याविषयी सुचवल्याची माहिती समोर येत आहे.

 बीड जिल्ह्यातील सत्ताधारी पक्षासह विरोधी पक्षांच्या आमदारांच्या आवाजाला धार आली. ही क्रूर हत्या वाल्मिक कराड याच्या इशाऱ्यावरूनच करण्यात आल्याचा ठपका त्यांनी ठेवला. या प्रकरणी सुरुवातीला चालढकल करणाऱ्या पोलिसांवर मोठा दबाव आला. त्यानंतर वाल्मिक कराड 20 ते 22 दिवसांनी समोर आला. पुण्यातील पाषाण रोडवरील सीआयडी कार्यालयात तो दाखल झाला. त्याला अटक करून केज न्यायालयासमोर उशीरा रात्री दाखल करण्यात आले. मंगळवारी 31 डिसेंबर रोजी हा घटनाक्रम झाला. त्याला 14 दिवसांची कोठडी सुनावण्यात आली.