मुंबई: मुंबईतील कुर्ला परिसरात आज भीषण बेस्ट बस अपघात घडला. या दुर्दैवी घटनेत आतापर्यंत 7 जणांचा मृत्यू झाला असून, 30 ते 35 जण गंभीर जखमी झाले आहेत. अपघाताच्या वेळी बसमध्ये तब्बल 60 प्रवासी प्रवास करत होते, ज्यामुळे अपघाताचे गांभीर्य वाढले आहे.

प्राप्त माहितीनुसार, बेस्ट बसचा अचानक नियंत्रण सुटल्याने हा अपघात झाला. अपघातानंतर घटनास्थळी मोठा गोंधळ उडाला. नागरिकांनी तत्काळ मदतकार्य सुरू केले आणि जखमींना जवळच्या रुग्णालयात दाखल करण्यात आले.

या दुर्दैवी घटनेवर मुख्यमंत्री देवेंद्र फडणवीस यांनी शोक व्यक्त केला आहे. त्यांनी मृतांच्या कुटुंबीयांना मुख्यमंत्री सहायता निधीतून 5 लाख रुपयांची आर्थिक मदत जाहीर केली आहे. तसेच, जखमींच्या उपचाराचा संपूर्ण खर्च सरकारकडून उचलला जाईल, असे आश्वासनही दिले आहे.

या अपघातामुळे संपूर्ण मुंबईकर समाजमन हादरले आहे. प्रवाशांच्या सुरक्षिततेबाबत अनेक प्रश्न उपस्थित होत आहेत. याचप्रमाणे, वाहतुकीच्या व्यवस्थापनावरही पुन्हा विचार करण्याची गरज असल्याचे तज्ज्ञांनी नमूद केले आहे.

“कुर्ला येथे बेस्ट बसच्या अपघातात काही लोकांचे मृत्यू झाले, त्याबद्दल तीव्र दुःख व्यक्त करत मुख्यमंत्री देवेंद्र फडणवीस यांनी भावपूर्ण श्रद्धांजली अर्पण केली आहे. त्यांच्या कुटुंबियांच्या दुःखात आम्ही सहभागी आहोत. तसेच जखमींच्या प्रकृतीत लवकर सुधारणा व्हावी, यासाठी मी प्रार्थना करतो. या घटनेतील मृतांच्या वारसांना मुख्यमंत्री सहायता निधीतून 5 लाख रुपये आर्थिक मदत देण्यात येईल, असेही त्यांनी सांगितले आहे. या घटनेत जे जखमी झाले, त्यांच्या उपचाराचा खर्च मुंबई महापालिका आणि बेस्टच्या वतीने करण्यासाठी आदेश देण्यात आले आहेत”, असे देवेंद्र फडणवीस यांनी म्हटले आहे.