पुणे: महाराष्ट्र सरकारच्या लाडकी बहीण योजनेचा गैरफायदा घेत एका चोरट्याने पुण्यातील हडपसर परिसरात एका ज्येष्ठ महिलेची ८० हजार रुपयांच्या सोन्याच्या दागिन्यांची फसवणूक केल्याची धक्कादायक घटना घडली आहे. गुरुवारी (२८ नोव्हेंबर) हडपसर पोलिस ठाण्यात या प्रकरणाची तक्रार दाखल करण्यात आली आहे.

तक्रारदार महिला हडपसर भागातील रहिवासी आहेत. त्या नेहमीप्रमाणे रस्त्याने जात असताना एका अनोळखी व्यक्तीने त्यांना थांबवले. "आमच्या साहेबांनी लाडकी बहीण योजनेअंतर्गत पाच हजार रुपयांचे वाटप सुरू केले आहे," असे सांगून त्या महिलेला बोलण्यात गुंतवण्यात आले. चोरट्याने विश्वास संपादन करण्यासाठी त्यांना काही कागदपत्रे आणि प्रक्रिया पूर्ण करण्याच्या नावाखाली मंगळसूत्र व अंगठी काढून ठेवण्यास सांगितले.

महिलेचे लक्ष विचलित करून चोरट्याने त्यांचे मंगळसूत्र व अंगठी चोरी करून पळ काढला. चोरी झालेल्या दागिन्यांची किंमत सुमारे ८० हजार रुपये असल्याचे पोलिसांनी सांगितले.तक्रार दाखल होताच हडपसर पोलिसांनी परिसरातील सीसीटीव्ही फुटेजची तपासणी सुरू केली आहे. चोरट्याने अशा पद्धतीने आणखी कोणाची फसवणूक केली आहे का, याचा शोध घेतला जात आहे.

पोलिसांनी नागरिकांना आवाहन केले आहे की, अनोळखी व्यक्तींवर विश्वास ठेवू नका आणि सरकारी योजना किंवा फायदे मिळवण्याच्या नावाखाली कागदपत्रे, दागिने किंवा इतर मौल्यवान वस्तू कोणालाही देऊ नका. संशयास्पद परिस्थितीत तत्काळ पोलिसांशी संपर्क साधावा.